Аргенціна, Бразілія і Казахстан сталі чвэрцьфіналістамі чэмпіянату свету па міні-футболе
Фота з архіва
24 верасня, Мінск . Зборныя Аргенціны, Бразіліі і Казахстана прабіліся ў чвэрцьфінал чэмпіянату свету па міні-футболе ў Літве,
Дзеючыя чэмпіёны планеты аргенцінцы пасля першага тайма матчу 1/8 фіналу ўступалі парагвайцам 0:1, але ў другой палавіне поўнасцю перайгралі сваіх сапернікаў і ўзялі верх з рэзультатам 6:1. У паядынку за выхад у паўфінал аргенцінская каманда сустрэнецца з расіянамі, якія адолелі в’етнамцаў з мінімальнай перавагай у ліку (3:2). Гэта сустрэча стане паўтарэннем фіналу ЧС-2016 у Калумбіі, калі зборная Аргенціны абыграла расіян з рэзультатам 5:4.
Пяціразовыя чэмпіёны свету бразільцы ў няпростым паядынку абыгралі японцаў – 4:2 і ў чвэрцьфінале згуляюць з мараканцамі, якія раней перамаглі венесуэльцаў (3:2). Зборная Казахстана без асаблівых праблем разабралася з камандай Тайланда, выйграўшы з сухім лікам 7:0, і цяпер чакае свайго апанента, які вызначыцца сёння пасля сустрэчы бронзавых прызёраў мінулага сусветнага першынства іранцаў з узбекамі. Таксама сёння іспанцы згуляюць з чэхамі, а партугальцы будуць сапернічаць з сербамі.
Чвэрцьфіналы пройдуць 26-27 верасня, паўфіналы намечаны на 29-30 верасня, а вырашальны паядынак за чэмпіёнскі тытул і матч за бронзавыя ўзнагароды адбудуцца 3 кастрычніка. Гульні сусветнага першынства прымаюць арэны Вільнюса, Клайпеды і Каўнаса.
Зборная Бразіліі пяць разоў станавілася чэмпіёнам свету, два тытулы ў іспанцаў, адзін – у аргенцінцаў.
