Тыдзень беларуска-японскай дружбы праходзіць у Беларусі 11-16 кастрычніка
Фота арганізатараў
11 кастрычніка, Мінск . У Беларусі 11-16 кастрычніка праходзіць Тыдзень беларуска-японскай дружбы. Аб гэтым расказалі ў пасольстве Беларусі ў Японіі.
У Год народнага адзінства японскі фальклорны калектыў “Мандзюсяка” разам з беларускімі артыстамі выступіць з канцэртамі ў Мінску, Магілёве, Маладзечне, Брагіне і Шклове. Ключавым мерапрыемствам стане выступленне калектыву ў Вялікай зале Белдзяржфілармоніі 16 кастрычніка.
Напярэдадні выступленняў артысты азнаёміліся з жамчужынамі беларускай гісторыі: Мірскім і Нясвіжскім замкамі, уключанымі ў Спіс Сусветнай спадчыны ЮНЕСКА.
“Сімвалічна, што гэты год адзначаны 35-й гадавінай чарнобыльскай катастрофы і 10-й гадавінай аварыі на АЭС Фукусіма-1, трагедыямі, якія цесна звязалі народы Беларусі і Японіі”, – сказалі ў дыпламатычнай місіі.
Тыдзень праходзіць па ініцыятыве Федэрацыі прафсаюзаў Беларусі і пасольства нашай краіны ў Японіі, а таксама пры падтрымцы беларускіх Міністэрства культуры і Міністэрства замежных спраў, Гомельскага, Мінскага, Магілёўскага аблвыканкамаў, Брагінскага, Маладзечанскага і Шклоўскага райвыканкамаў, Прэзідэнцкага спартыўнага клуба, Белдзяржфілармоніі і Беларуска-японскага бізнес-клуба.
