Партыя Зяленскага “Слуга народа” страціла лідзіруючую пазіцыю ў рэйтынгу папулярнасці
Уладзімір Зяленскі. Фота EPA-EFE
21 кастрычніка, Мінск /Кар. БЕЛТА/. Правячая ва Украіне партыя “Слуга народа” ў рэйтынгу папулярнасці палітычных сіл у краіне апусцілася на другое месца, уступіўшы першае партыі экс-прэзідэнта Пятра Парашэнкі “Еўрапейская салідарнасць”. Аб гэтым сведчаць вынікі апытання, апублікаваныя на сайце Кіеўскага міжнароднага інстытута сацыялогіі (КМІС).
КМІС прыводзіць рэйтынг партый на выбарах у Вярхоўную раду Украіны, калі б яны ўдзельнічалі ў выбарах. Згодна з вынікамі апытання, “адносна высокую падтрымку маюць чатыры партыі: “Еўрапейская салідарнасць” (13,9 працэнта ўсіх рэспандэнтаў і 15,7 працэнта сярод тых, хто вызначыўся з выбарам), “Слуга народа” (адпаведна, 13,7 працэнта і 15,5 працэнта), “Бацькаўшчына” (экс-прэм’ера Украіны Юліі Цімашэнка – 12 працэнтаў і 13,6 працэнта) і “АПЗЖ” (“Апазіцыйная платформа – За жыццё” Юрыя Бойкі – 11,5 працэнта і 13 працэнтаў)”.
“Слуга народа” ўпершыню з 2019 года страціла лідзіруючую пазіцыю.
Адзначаецца таксама, што 42,1 працэнта рэспандэнтаў назвалі адной з галоўных прычын эканамічнага крызісу ў краіне высокі ўзровень карупцыі, 31,2 працэнта – некампетэнтнасць улады, 12,1 працэнта – пандэмію каранавіруса і толькі 0,3 працэнта заявілі, што ва Украіне няма эканамічнага крызісу.
Апытанне праводзілася з 15 па 18 кастрычніка метадам тэлефонных інтэрв’ю. Апытаны 1,2 тыс. чалавек, якія пражываюць ва ўсіх рэгіёнах Украіны.
Раней паведамлялася, што рэйтынг Уладзіміра Зяленскага знізіўся да 24,7 працэнта. Месяц таму рэйтынг дзеючага прэзідэнта быў 33,3 працэнта.-0-
