Два верталёты Мі-2 авіякампаніі “Орша Эйр” прададзены на электронных таргах за Br32,5 тыс.
11 кастрычніка, Віцебск . Два верталёты Мі-2 унітарнага прадпрыемства “Авіякампанія “Орша Эйр” прададзены на электронных таргах сумарна за Br32,5 тыс., паведаміў дырэктар ТАА “ВітЮркам” (кампанія выконвае функцыі антыкрызіснага кіраўніка) Мікалай Кротаў.
Рэалізаваныя вінтакрылыя машыны размяшчаюцца ў Маскоўскай вобласці, куды былі пастаўлены для капітальнага рамонту і тэхнічнага абслугоўвання на базе АТ “Маскоўскі авіяцыйна-рамонтны завод ДТСААФ”.
Лятальныя апараты выстаўляліся на паўторны аўкцыён метадам паніжэння пачатковай цаны. На лоты зарэгістраваліся па 2 удзельнікі, пры гэтым таргі праходзілі па падобным сцэнарыі. Прэтэндэнты таргаваліся на паніжэнне, а калі цана даходзіла да мінімальнай, адзін з пакупнікоў рабіў адну стаўку на павышэнне і станавіўся пераможцам аўкцыёну.
Пачатковая цана самага дарагога лота перасягала Br55,7 тыс., а пераможца заплаціць за яго Br18,7 тыс. Другі апарат набыты за Br13,8 тыс. (пачатковая цана амаль Br41,2 тыс.). Выручаныя грошы будуць накіраваны на выплаты па пазачарговых плацяжах і пагашэнне завінавачанасці перад крэдыторамі ў адпаведнасці з рэестрам патрабаванняў, памер якіх складае каля Br600 тыс.
Усяго патэнцыяльным пакупнікам прапаноўваліся 4 верталёты, два з якіх аказаліся незапатрабаванымі. Яны базіруюцца на аэрадроме прыпіскі ў гарпасёлку Балбасава Аршанскага раёна. Кампанія атрымала тэхніку бязвыплатна ад свайго заснавальніка ААТ “Аршанскі авіярамонтны завод”. Верталёты знаходзяцца ў рознай ступені гатоўнасці да лётнай эксплуатацыі, для чаго іх неабходна даўкамплектаваць абсталяваннем (рухавікі, лопасці, рэдуктары і г.д.), а таксама выканаць тэхнічныя і рамонтныя работы.
Унітарнае прадпрыемства па аказанні паслуг “Авіякампанія “Орша Эйр” створана ў ліпені 2013 года на базе ААТ “Аршанскі авіярамонтны завод” для дэманстрацыйных палётаў і вырашэння бягучых вытворчых задач. У кастрычніку 2018 года ўласнік кампаніі прыняў рашэнне аб яе ліквідацыі. Паколькі ліквідатар не змог разлічыцца па даўгах арганізацыі, было вырашана звярнуцца ў суд з заявай аб эканамічнай неплацежаздольнасці (банкруцтве) ліквідуемага даўжніка ў сувязі з выяўленнем недастатковасці кошту маёмасці для задавальнення патрабаванняў крэдытораў. Справа аб банкруцтве авіякампаніі “Орша Эйр” была ўзбуджана эканамічным судом Віцебскай вобласці ў жніўні 2020 года, а ў лістападзе кампанія прызнана банкрутам. У адносінах да даўжніка адкрыта ліквідацыйнае вядзенне па справе, якое прадоўжана да лістапада 2021 года.
