Баравік: для CNN важней маніпуляваць аўдыторыяй, чым аб’ектыўна даносіць інфармацыю
Вадзім Баравік. Фота з архіва
5 кастрычніка, Мінск . Тэлекампанія CNN не гатова аб’ектыўна даносіць інфармацыю, для яе важней маніпуляваць уласнай аўдыторыяй. Такое меркаванне па выніках інтэрв’ю Прэзідэнта Беларусі Аляксандра Лукашэнкі CNN газеце “Беларусь сегодня” выказаў палітолаг Вадзім Баравік,
“Беларусы могуць ганарыцца сваёй краінай і Прэзідэнтам. Мы заўсёды адкрытыя і шчырыя ў выказванні сваёй пазіцыі. Кіраўнік дзяржавы ад імя беларускага народа адстойвае нацыянальныя інтарэсы нашай краіны. І, шчыра кажучы, бледна выглядаў на яго фоне журналіст CNN, які паводзіў сябе, мякка кажучы, недалікатна. Ён не ўлічыў, што перад ім кіраўнік дзяржавы. Пачаў з нападкаў, галаслоўных абвінавачанняў. Нуль фактаў, толькі заезджаныя клішэ. Гэта не пацвярджае яго прафесіяналізм, – лічыць эксперт. – Чаму мы ставілі ўмову даць інтэрв’ю без купюр? Таму што наша задача – давесці нескажоную пазіцыю Беларусі да шырокай аўдыторыі. Мы гаворым адкрыта, сумленна, шчыра. Пацвярджаем сваю пазіцыю канкрэтнымі аргументамі. І калі ідзе поўная прамова першай асобы, не вырваная з кантэксту, паўстае аб’ектыўная карціна”.
Вадзім Баравік нагадаў: на жаль, CNN першапачаткова пусціла нарэзку кадраў, у якой толькі ўкрапваннямі былі ўстаўлены словы Прэзідэнта. “Гэта сведчыць аб тым, што яны адчулі сілу ў яго выступленні. Яны не гатовы аб’ектыўна даносіць інфармацыю. Для іх важней маніпуляваць уласнай аўдыторыяй. Гэта непрыстойна. Калі журналіст CNN задаваў пытанне, у яго не было мэты пачуць адказ. У канала была мэта агучыць свой пункт гледжання, навязаць яго аўдыторыі. Абвінаваціць Лукашэнку ў нейкіх, з іх пункту гледжання, неправамерных дзеяннях, абвінаваціць у нечым Беларусь. У тым ліку і ў сітуацыі з мігрантамі. І калі яны чулі праўдзівую, дакладную, аргументаваную прамову Прэзідэнта, яны, вядома, разумелі, што ў вачах сваёй аўдыторыі будуць выглядаць бледна. Проста сядуць у лужыну”, – упэўнены палітолаг.
Таксама ён адзначыў, што ўсе пачулі дастойную, аргументаваную прамову Прэзідэнта, але нападак з яго боку не было. “Ён пераканаўча адстойваў наш пункт гледжання. Тым самым ён дэманстраваў дружалюбную пазіцыю Беларусі, гатоўнасць весці дыялог з нашымі партнёрамі на Захадзе. Адзіная ўмова – не націскаць на нас, весці ўзаемна паважлівы дыялог. Чуць нас. І мы ў сваю чаргу гатовы чуць іх. І ў працэсе перагавораў выпрацоўваць узаемна выгадныя рашэнні, – падкрэсліў Вадзім Баравік. – Мы зацікаўлены і ў палітычных, і ў гандлёва-эканамічных адносінах з Захадам. І на граніцы нам праблемы не патрэбны. Мы не хочам ваяваць з нашымі суседзямі. Не хочам нейкага напружання. Зразумела, нам выгадна выбудоўваць нармальныя адносіны з заходнімі партнёрамі. Беларусь знаходзіцца ў цэнтры Еўропы. Вельмі дорага мець напружанасць на граніцы. Нявыгадна аблятаць самалётамі дастаткова вялікую адлегласць з пункту гледжання лагістыкі, пастаўкі энерганосьбітаў. У тым ліку ва Украіну”.
